ТҮРКІСТАНДА «АМАНАТ» АЗАМАТТЫҚ АЛАҢЫНЫҢ СЕМИНАР-КЕҢЕСІ ӨТТІ

15 Мамыр, 2019

Бүгін Түркістан қаласы Жастар ресурстық орталығында «Аманат» азаматтық алаңының Түркістан облыстық өкілдігінің ұйымдастыруымен баспасөз конференциясы болып өтті. Жиынға техника ғылымдарының докторы, республикалық «Аманат» азаматтық платформасының штаб мүшесі Мұсағали Дуамбеков, республикалық «Аманат» азаматтық платформасының штаб басшысы Лима Диас, «Аманат» азаматтық платформасының Түркістан облыстық өкілдігінің жетекшісі Бектай Орманов және аудан, қалалардағы мобильді капитандар қатысты. Қонақтар «Аманат» азаматтық алаңының мақсаты мен сайлаудың әділ өтуі үшін қолға алынған жұмыстарымен таныстырды.

Баспасөз мәслихатынан кейін «Жастар ресурстық орталығында» аудан, қалалардан келген мобильді капитандардың қатысумен семинар-тренинг өтті. Семинарды техника ғылымдарының докторы, республикалық «Аманат» азаматтық платформасының штаб мүшесі Мұсағали Дуамбеков жүргізіп отырды. Ол аудандар мен қалаларға бекітілген мобильді капитандардың жұмыс бағыттарын айтып, сайлау үшін қажетті жағдай жасаудың бес негізгі бағытын түсіндірді. Сайлау бөлімшелеріне бекітілген бақылаушылардың құқықтары мен жүктелген міндеттерін түсіндіру, олардың жұмысын қадағалауға басшылық жасау бойынша дәрістер өтті. Сонымен қатар сайлау күні сайлаушылардың дауыс беруі кезінде заңсыздықтар мен келеңсіздіктерге жол бермеудің алдын алу шаралары да түсіндірілді. Барлық қатысушыларға «Бақылаушы блокноты» таратылып берілді.

Сондай-ақ келесі мәжіліс залында облыс жастарымен де семинар-тренинг өткізілді. Семинарды республикалық «Аманат» азаматтық платформасының штаб басшысы Диас Лима жүргізді. Ол онлайн заңгерлік кеңес беру қызметін құру және алғаш рет дауыс беретін жас сайлаушылардың құқықтары мен міндеттері жөнінде баяндады. Түркістан облысының барлық өңірлерінен жиналған жастар сайлау жөнінде көкейлерінде жүрген сұрақтарына жауап алып, модератормен пікір алмасты.

Елімізде сайлау барысына қоғамдық мониторинг жүргізу мақсатында құрылған «Аманат» азаматтық алаңы 22 сәуірден өз жұмысын бастағаны белгілі. 29 сәуірде «Аманат» азаматтық платформасының Түркістан облыстық өкілдігі алғашқы жиынын өткізді. Бүгінде қоғамдық ұйымдар мен БАҚ өкілдері, жастар, сарапшылар, азаматтық белсенділердің шоғырланған тәуелсіз ерікті бірлестігі жемісті жұмыс атқарып келеді.

Түркістан облысының Өңірлік коммуникациялар қызметі